Lekime

Lekime arroila helburu, Baxe Nafarroara buruz abiatu ginen goizeko hitzorduaren tenorea taldeko nagienekin eztabaidatu ondoren. Garai batean erresuma batzen zuten bortuak igarota, Mendibe herri ttipian elkartu genuen artaldea. Eguraldi iragarpena alde genuen eta zerbaiten jatera eseri ginen deus baino lehen.

Ohartu gabe luzatu zitzaigun otordua eta, aitzinetik arroila luzea genuela jakitun, argiak sartu genituen bote estankoan.

Pirinioek beren hondar elurrak erakutsi zizkiguten ekialdean eta oinen azpian bertikaltasun handiko sakanak agertu zitzaizkigun berehala. Hegan egiteko gogoa erreprimitu genuen. Iratiri eta Oriko kaskoari bizkarra emanik, Behorlegi, Beltxu eta Ahüzkiko basoei behatu genien. Biduzeren iturburua igar zitekeen parez pare Arbaila mendigunean.

Beheiti amildurik, mendi magal berdea apurtzen zuen arrakalan sartu ginen luze gabe.

Lekimek, gutariko batzuendako ezezaguna ordura arte, maitemindurik utzi gintuen, hasieratik bukaerara. Instalazioa arras prekarioa izan arren, arroilaren rappel zoragarriek eta paisaiaren edertasunak hagitz zapore ona utzi ziguten, masifikazio orotatik kanpo, arroilen jaitsieren eta mendizaletasunaren jatorriaren izpiritura itzuli izan bagina bezala. Egun xarmangarria borobiltzeko, ezkutuko hiri elfiko batera zihoala ematen zuen bidexendra liluragarri batetik egin genuen autorainoko itzulia, Papua Ginea Berriko argazki baten barnean egon izanaren sentsazioarekin.

Testua eta bideoa: Ernesto
Argazkaik: Zuriñe